Anëtari i KQZ-së nga radhët e Lëvizjes Vetëvendosje, Sami Kurteshi, deklaroi se siguria është e plotë për çdo votues që shpreh vullnetin e tyre politik gjatë procesit zgjedhor në katër komunat veriore.
Në një prononcim të shkurtër për Tëvë1, nga fshati Çabër në Zubin Potok, Kurteshi tha se tani është koha që Kosova ta dëshmojë se nuk mund të ketë arbitraritet dhe monopol të asnjë subjekti politik.
“Bojkotimi do të thotë që është i dirigjuar nga Beogradi, nga Lista Serbe dhe nga grupet kriminale me kërcënime e shantazhe. Ne si shtet duhet ta dëshmojmë se nuk mund të ketë arbitraritet dhe monopol të asnjë subjekti politik, sovranitetin e vetëm këtu e ka shteti i Kosovës. Siguria është e plotë, mundësia e secilit votues për ta shprehur vullnetin e tyre politik po ashtu është, ata që janë të gatshëm e shprehin. Por, institucionet demokratike duhet të ndërtohen. Nuk mund të ankohet askush që nuk iu është ofruar mundësia për ta shprehur vullnetin e votës”, potencoi Kurteshi.
Njëherit, ai tha se deri më tani procesi zgjedhor ka shkuar në rregull, pa incidente e pa probleme.
“Sipas neve procesi zgjedhor është duke shkuar në rregull, nuk kemi incidente, nuk kemi probleme dhe mangësi. Në këto rrethana ne kemi bërë përpjekje që t’i organizojmë zgjedhjet sa më mirë që është e mundur, rrethanat janë pak të rënduara, sepse e kemi problemin e bojkotimit nga shumica e votuesve të komunitetit serb”, shtoi tutje Kurteshi./teve1.info/.
