Avokati, Arbër Jashari ka deklaruar se vendimi final në çështjen gjyqësore të ish-krerëve të Ushtrisë Çlirimtare të Kosovës në Hagë pritet të merret më së largu në muajin maj të vitit të ardhshëm.
Në emisionin “Ditari” në Tëvë1, Jashari ka thënë se procesi gjyqësor tashmë ka hyrë në fazën përfundimtare.
Sipas tij, rregullorja e procedurave dhe provave parasheh që deklaratat përmbyllëse dhe përfundimi i paraqitjes së provave të mbahen nga 9 deri më 13 shkurt 2026.
Pas kësaj date, trupi gjykues ka afat maksimal prej tre muajsh për të shpallur aktgjykimin.
“Pas kësaj date, trupit gjykues do t’i duhen më së shumti tre muaj, aq sa lejon rregullorja, për ta shpallur aktgjykimin, për të cilin ne shpresojmë që të jetë lirues për ish-krerët e UÇK-së. Nëse bazohemi në këtë logjikë, atëherë aktgjykimin mund ta kemi më së largu në maj,” ka thënë Jashari, duke theksuar se për herë të parë ekziston një orientim i qartë kohor për mbylljen e procesit.
Ai ka shtuar se gjykata mund ta sjellë vendimin edhe më herët se afati tre-mujor, ndërsa rregullorja lejon shtyrjen e tij deri në 60 ditë shtesë në rrethana të jashtëzakonshme.
Megjithatë, Jashari është shprehur optimist se vendimi do të shpallet brenda afatit bazë.
“Jam optimist se vendimi nuk do t’i shfrytëzojë të gjitha afatet dhe mund të dalë edhe më herët,” ka përfunduar ai./teve1.info/
