Shkëndija e Tetovës është gati për një tjetër natë historike në arenën evropiane.
Kampionët e Maqedonisë së Veriut do të zbresin sonte në fushën e stadiumit “Tose Proeski Arena” në Shkup, ku do të përballen me skuadrën e Qarabag-ut nga Azerbajxhani, në kuadër të raundit të tretë kualifikues të Ligës së Kampionëve.
Të udhëhequr nga trajneri Jeton Beqiri, kuqezinjtë vijnë me moral të lartë pas eliminimit të bujshëm të gjigantëve rumunë të Steaua Bukureshtit në raundin e mëparshëm, një sukses që ka rritur entuziazmin dhe besimin në radhët e ekipit dhe tifozëve.
Atmosfera pritet të jetë elektrizuese, me mbështetjen e zjarrtë të tifozëve, të cilët shpresojnë të shohin ekipin e zemrës duke bërë edhe një hap drejt lavdisë kontinentale.
Edhe pse pjesëmarrja në një fazë grupore tashmë është e sigurt, të paktën në UEFA Conference League, Shkëndija nuk ka ndërmend të ndalet.
Objektivi i tyre është i qartë: një vend në fazën e grupeve të Champions League, një arritje që do të hynte në histori për klubin dhe futbollin shqiptar në Maqedoni.
Ndeshja nis në orën 20:00 dhe pritet me interes të jashtëzakonshëm nga dashamirësit e futbollit në mbarë rajonin.
