Eksperti i çështjeve të sigurisë, në emisionin “Matrix” në Tëvë1, ka komentuar përçarjen e parë politike që dëmtoi shqiptarët, duke e lidhur atë me shkatërrimin e Lidhjes së Prizrenit dhe shpjeguar se ku filloi kjo përçarje.
Kulla theksoi se Lugina e Preshevës nuk ka qenë pjesë e Kosovës, por Kosova ka qenë pjesë e një entiteti më të gjerë, me qendër në Shkup. Sipas tij, Kosova nuk ka qenë e ndarë siç e shohim sot dhe ka kaluar nëpër periudha të ndryshme, duke u lidhur me vilajetet osmane.
“Kosova ka qenë pjesë e vilajetit të Kosovës, ku kryeqyteti ishte Shkupi. Sikur shqiptarët të ishin më të bashkuar në vitet 1911-1912, mund të kishin shfrytëzuar periudhën e dobësisë së Perandorisë Osmane dhe mund të kishin pasur kryeqytetin në Shkup”, tha ai.
Kulla gjithashtu përmendi se përçarja e parë politike ndodhi gjatë periudhës së Lidhjes së Prizrenit në vitin 1880, kur ajo u shkatërrua si pasojë e një lufte mes dy familjeve të mëdha në Gjakovë. Sipas tij, kjo përçarje u shkaktua nga një ngërç politik dhe ushtarak brenda Lidhjes, për shkak të mbrojtjes ose mosmbrojtjes së një komandanti osman, i cili ishte në besën e një prej familjeve më të mëdha.
“Përçarja politike që solli ndarjen e Lidhjes së Prizrenit u shkaktua nga një luftë mes dy familjeve të mëdha në Gjakovë, për mbrojtjen ose mos mbrojtjen e një komandanti osman. Kjo përçarje e çoi në ndarjen e Lidhjes dhe ka lënë pasoja të thella”, ka shtuar Kulla.
