Njohësi i çështjeve të sigurisë, Ilir Kulla, ka komentuar në emisionin “Matrix” në Tëvë1 zhvillimet në zgjedhjet lokale në Maqedoninë e Veriut, ku sipas tij BDI-ja po përballet me humbje të mbështetjes dhe fraksionime të brendshme që po ndikojnë në rezultatet.
Kulla theksoi se mosmbështetja ndaj kandidatit të partisë së Bashkimit Demokratik për Integrim Deharit, ka ardhur si pasojë e ndarjeve dhe konfliktit të brendshëm në këtë parti.
“Fatmir Limani që nuk mbështeti Deharin është sepse ka ndarje të pushtetit, dhe për këtë kemi edhe këto rezultate,” tha Kulla.
Ai shtoi se beteja politike në mesin e shqiptarëve në Maqedoninë e Veriut ka ndryshuar dhe nuk është më një përplasje mes shqiptarëve dhe maqedonasve, por mes vetë shqiptarëve për shkak të fraksionimit brenda komunitetit.
“Unë kam thënë që beteja e ardhshme nuk do të jetë më shqiptar-maqedonas, por do të jetë shqiptar-shqiptar për shkak të fraksionimit. Nëse nuk ndryshon narrativa dhe gjuha, do të kemi të njëjtën situatë si në Çair,” tha ai, duke iu referuar lagjes me popullsi kryesisht shqiptare në Shkup.
Ilir Kulla vuri në dukje edhe fitoren e Izet Mexhitit, ish-kryetarit të BDI-së për komunën e Çairit dhe nënkryetarit të partisë, duke e lidhur këtë me ndarjet në parti dhe përplasjet brenda komunitetit shqiptar.
“Ka fituar Izeti Mexhiti sepse ai është ish-krytar i BDI-së për Çairin dhe nënkryetar i partisë. Këtu kemi fraksionim të shqiptarëve dhe ndarje të brendshme në BDI,” përfundoi Kulla.
