Ish-nënkryetari i Gjykatës Kushtetuese të Kosovës, Kadri Kryeziu, ka reaguar ndaj bllokadës së vazhdueshme në Kuvendin e Kosovës, duke e cilësuar situatën si të jashtëzakonshme dhe kundër frymës kushtetuese.
Në emisionin “Këndi i Debatit”, Kryeziu theksoi se deputetët që nuk marrin pjesë në procesin e votimit, përkundër detyrimit kushtetues për të votuar – qoftë pro, kundër apo me abstenim – janë duke e shkelur Kushtetutën e vendit.
“Veprimet e deputetëve janë në tentativë, sepse nuk janë deputetë në kuptimin e plotë të fjalës. Ata kanë vetëm një marrëdhënie juridike të karakterit politik. Nuk mund të quhesh deputet efektiv nëse nuk arrin të marrësh asnjë vendim apo të miratosh ndonjë ligj”, deklaroi Kryeziu në Tëvë1.
Ai theksoi se situata e krijuar në Kuvend është e pazakontë dhe kërkon masa të jashtëzakonshme, duke kujtuar se Kushtetuta u kërkon deputetëve detyrimisht të votojnë në proceset parlamentare.
“Që nga viti 2014, është obligim kushtetues që deputeti të marrë pjesë në votim. Nëse nuk e bën këtë, është shkelje e Kushtetutës”.
Megjithatë, Kryeziu theksoi se Kushtetuta nuk parashikon drejtpërdrejt ndëshkime për këtë shkelje, përveç masave politike ose morale.
Sipas tij, janë tri masa ndëshkuese kushtetuese të mundshme: revokimi, dorëheqja dhe shkarkimi, #por ato duhet të inicohen nga vetë Kuvendi si organ kompetent#.
“Shkelja ekziston, por ndëshkimi mbetet në nivelin moral. Kuvendi ka përgjegjësinë që të veprojë në raste të tilla”, përfundoi ai.
Situata në Kuvendin e Kosovës ka mbetur e bllokuar tash e sa javë, pasi përpjekjet për konstituimin e tij kanë dështuar plot 31 herë, me mungesë kuorumi dhe refuzim të pjesëmarrjes në votime nga një numër i madh deputetësh./teve1.info/
