Deputetja e Lëvizjes Vetëvendosje Arbëreshë Kryeziu-Hyseni ka thënë se ekzistojnë mënyra se si të krijohet një dialog ku diskutohet më gjerësisht për çështjen e Asociacionit.
Për takimin e sotëm organizuar nga Ambasada e ShBA-së e vlerësoi se nuk pati diçka përmbajtjesore, përderisa pyeti se pse një diskutim i tillë nuk është organizuar në Serbi.
“Sot pati diskutim po nuk e di se doli diçka përmbajtjesore prej takimit të sotëm përpos komunikata e njëjtë se duhet të themelohet Asociacioni. Unë mendoj se njëjtë do të duhej të ndodhte edhe në Beograd. Zyra Amerikane do të duhej të krijonte atje një takim të formatit të tillë”, ka shtuar ajo në Këndin e Debatit në Tëvë 1.
Sipas saj presion për këtë çështje po bëhet vetëm në Kosovë, e kjo për shkak të mosunifikimit të spektrit politik.
“Presioni është vetëm në Kosovë. Presion nuk ka te pala tjetër që po e bllokon procesin e dialogut. Te ne ka presion se nuk kemi qëndrim njëzëri prej Asociacionin. Po të kishim qëndrim të njëjtë, nuk besoj që presioni do të ishte sikur që është sot”.
“Përgjigjja e jonë është që nuk ka Asociacion në baza njëetnike. Presioni po vazhdon përderisa qëndrimi i Qeverisë vazhdon të mbetet i njëjtë. Asnjëherë nuk është dhënë një shenjë se shiko edhe mund të flasim. Gjithmonë kemi pasur qëndrim të prerë sa i përket kësaj çështje”, ka shtuar ajo.
