Në orën 15:00 thirrën seancë të jashtëzakonshme.
Në rend dite në këtë mbledhje të së enjtes të Kuvendit Komunal të Prishtinës ishin dy pika: bartja e mjeteve vetanake nga viti 2024 në 2025 dhe miratimi i buxhetit për vitin 2026.
Votën e asamblistëve për këto dy çështje e kërkoi i pari i kryeqytetit, Përparim Rama.
“Në këtë situatë të ndjeshme financiare dhe institucionale, prioritet absolut janë nevojat e qytetarëve, asnjë kalkulim politik nuk guxon të vihet mbi nevojat e tyre. Fondet që po i trajtojmë sot do të shfrytëzohen menjëherë për funksionalizimin e ndërmarrjeve publike, për mbrojtjen e vendeve të punës, për pagat e punëtorëve dhe për shërbimet bazike të kryeqytetit”, tha Rama.
Më pas, pika e parë e mjeteve vetanake që kapin vlerën e 28 milionë eurove, u hodh në votim.
Nga 41 asamblistë sa ishin të pranishëm, 38 votuan pro, ndërsa një abstenoi.
Grupi i Partisë Demokratike të Kosovës votuan për, mirëpo kërkuan sqarime për destinimin e fondeve.
“Bartja buxhetore e mjeteve nga viti 2024 në vitin 2025 mund të paraqesë zgjidhje të përkohshme, por është e domosdoshme të dihet nëse kjo bartje shërben si mundësi për t’i rikthyer shërbimet esenciale në kryeqytet, siç është transporti publik, shujtat e fëmijëve në shkolla, të paguajë borxhin për mbeturinat dhe të sigurojë pagat për punëtorët e ndërmarrjeve publike”, tha Leutrim Retkoceri, asamblist i PDK-së.
Ani pse votuan pro, nga Vetëvendosje akuzuan LDK-në për gjithë situatën e krijuar.
“Vetëm kur punëtorët e trafikut dolën në rrugë atëherë e kuptoj se bartja e mjeteve nuk bëhet në studio televizive por në kuvendin komunal. Kriza i duhet Përparim Ramës dhe LDK e përdori këtë strategji për fushatën lokale tash dëshiron ta përdor edhe për zgjedhjet lokale”, tha asamblesiti Gëzim Sveçla.
Votimit iu gëzua i pari i kryeqytetit.
“I falënderoj të gjithë asamblistët që votuan këtë bartje e cila do t’i ndihmoj kauzës sonë për të zhbllokuar proceset në kryeqytet. Uroj edhe një herë që edhe 35 milionë tjerë të zhbllokohen nga ministri i Financave në detyrë”, ishte reagimi i Ramës.
Me këtë vendim është hapur rruga për rikthimin e transportuesve publikë në Prishtinë.
Mirëpo, ani pse të pranishëm në seancë ishin edhe sindikalistët, ata thanë se ky vendim nuk i tërhjek nga protesta.
Ai bëri të ditur se për shkak të festës së 28 nëntorit, nëse mjetet nuk alokohen, protestën do ta vazhdojnë të hënën.
Në anën tjetër, kryetari Rama tha se pret që të hyrat prej 28 milionë eurosh për vitin 2024 të bartën sot pas miratimit në Asamble.
Ndërkaq, miratimi i buxhetit të kryeqytetit për vitin 2026 është shtyrë për t’u votuar nga asambleistët e rinj të Kuvendit Komunal.
