Kryeministri në detyrë i Republikës së Kosovës, Albin Kurti, priti sot në takim Përfaqësuesin Special të Norvegjisë për Ballkanin Perëndimor, z. Eirik Nestås Mathisen.
Kryeministri Kurti vlerësoi marrëdhëniet e mira ndërmjet Republikës së Kosovës dhe Norvegjisë, duke shprehur mirënjohje për mbështetjen e vazhdueshme që Norvegjia ka dhënë në të gjitha fazat e shtetndërtimit, si dhe në proceset integruese të vendit. Ai veçoi mbështetjen aktive të Norvegjisë për anëtarësimin e Kosovës në Këshillin e Evropës si një shembull i këtij angazhimi.
Gjatë takimit, palët diskutuan për mundësitë e forcimit të marrëdhënieve bilaterale dhe thellimit të bashkëpunimit në fusha të rëndësishme si: mbrojtja dhe siguria, energjia dhe teknologjia e informacionit. Gjithashtu, në takim u trajtuan edhe çështje rajonale dhe tema të tjera me interes të përbashkët.
Kryeministri Kurti falënderoi Norvegjinë për rolin e saj në arritjen e Marrëveshjes Tregtare ndërmjet Republikës së Kosovës dhe vendeve të Shoqatës Evropiane për Tregti të Lirë (EFTA), e cila pritet të hapë mundësi të reja për zhvillimin e marrëdhënieve ekonomike dhe zgjerimin e raporteve tregtare të vendit.
