Shefi i diplomacisë spanjolle, Jose Manuel Albares, ka konfirmuar se Spanja do të jetë i vetmi vend në zonën Shengen që nuk do të pranojë pasaportat e Kosovës, përkundër liberalizimit të vizave.
Albares, pas një takimi me shefin e diplomacisë gjermane në Berlin, tha se Spanja e ka politikën e saj të mosnjohjes së Kosovës, e këtu përfshihet edhe mosnjohja e pasaportave.
“Spanja ka politikën e saj të mosnjohjes së Kosovës dhe kjo përfshin mosnjohjen e pasaportës së Kosovës, siç kemi bërë vazhdimisht deri më tani”, tha Albares, transmeton RTS.
Brukseli njoftoi të premten se qeveria spanjolle do të jetë e vetmja në zonën Shengen që nuk do të zbatojë heqjen e vizave për Kosovën, aktin ligjor të ratifikuar nga Parlamenti Evropian këtë javë dhe që do të hyjë në fuqi më 1 janar 2024.
Njohja e dokumenteve të udhëtimit është një kompetencë kombëtare dhe Spanja nuk i njeh dokumentet e udhëtimit të Kosovës.
