Ministri i Punëve të Jashtme të Greqisë, Nikos Dendias, do të qëndrojë në Kosovë të dielën.
Kështu ka bërë të ditur ministria e Jashtme greke në web faqen e saj të shtunen.
Sipas njoftimit, Dendias do të pritet nga presidentja e Kosovës, Vjosa Osmani, me të cilën do të zhvillojnë edhe një takim.
Po ashtu, Dendias do të takohet edhe me kryeministrin, Albin Kurti dhe ministren e Jashtme të Kosovës, Donika Gërvalla – Schwarz.
“Ministri do të pritet fillimisht dhe do të zhvillojë një takim kokë më kokë me presidenten kosovare, Vjosa Osmani Sadriu. Më pas ai do të pritet dhe do të zhvillojë një takim me kryeministrin kosovar, Albin Kurti, në një drekë të shtruar për nder të tij nga ky i fundit”, thuhet në njoftim.
Ndërkaq, bëhet e ditur nga MPJ-ja e Greqisë se diskutimet gjatë vizitës pritet të fokusohen në zhvillimet në dialogun Beograd-Prishtinë dhe perspektivën evropiane të Ballkanit Perëndimor. /Teve1.info/
