Pavarësisht një armëpushimi të brishtë në Gaza, të ndërmjetësuar nga SHBA-ja, Izraeli kreu sulme në Qytetin e Gazës duke vrarë liderin më të lartë ushtarak të Hamasit, Izz al-Din al-Haddad, sipas një deklarate të përbashkët nga Forcat Mbrojtëse të Izraelit dhe Agjencia Izraelite e Sigurisë.
Të paktën tre palestinezë u vranë dhe dhjetëra të tjerë mbetën të plagosur nga sulmi i madh i së martës, i cili goditi një ndërtesë banimi në një nga zonat më të frekuentuara të tregut në qytetin e Gazës, thanë mjekët lokalë dhe dëshmitarët.
Ushtria izraelite dhe shërbimi i sigurisë Shin Bet deklaruan se objektivat e sulmuara ishin ndërtesa që shërbenin si vendstrehim për Odeh, pasi lëvizjet e tij ishin monitoruar për disa muaj.
Nga Hamasi nuk pati koment të menjëhershëm, raportojnë mediat e huaja.
Ky është sulmi më i fundit vdekjeprurës izraelit në Gaza, pavarësisht armëpushimit me Hamasin që kishte hyrë në fuqi në tetor.
Sulmi goditi tre katet e sipërme të ndërtesës “al-Kayali” në qendër të qytetit të Gazës, në një kohë kur rrugët ishin të mbushura me qytetarë që bënin blerje para festës myslimane të Kurban Bajramit.
“Në kuadër të operacionit të përbashkët të IDF-së dhe Shin Bet për eliminimin e terroristit Mohammed Odeh, u sulmuan disa ndërtesa në zemër të Qytetit të Gazës që shërbenin si vendstrehim për të, pas muajsh mbikëqyrjeje të inteligjencës për të gjurmuar lëvizjet e tij dhe të ndihmësve të tij në organizatë”, thanë Forcat Mbrojtëse të Izraelit (IDF) dhe Shin Bet në një deklaratë të përbashkët.
Ata shtuan se kishin goditur gjithashtu “një apartament aty pranë që i përkiste një terroristi të Hamasit që mori pjesë në sulmin e 7 tetorit dhe ishte pjesë e rrethit të ndihmësve të Odeh”, duke iu referuar sulmit të udhëhequr nga Hamasi në jug të Izraelit që shkaktoi luftën në Gaza.
Ekipet e shpëtimit nxituan drejt vendit të ngjarjes, por patën vështirësi të arrinin katet e sipërme për shkak të dëmeve të mëdha dhe bllokimit në zonë.
