Një ngjarje e rëndë ka tronditur mbrëmë fshatin Golluboc të komunës së Malishevës, ku dy vëllezër – 32 dhe 45 vjeç – mbetën të vrarë me armë zjarri nga dhëndri i tyre, i cili më pas është larguar nga vendi i ngjarjes.
Sipas të dhënave të para nga hetimet, i dyshuari me inicialet A.I. kishte shkuar në shtëpinë e familjes së bashkëshortes së tij për ta marrë atë, pasi ajo po qëndronte aty pas vdekjes së babait. Pikërisht në momentin kur gruaja po dilte nga shtëpia, jashtë portës ka shpërthyer konflikti verbal, që më pas është përshkallëzuar në përdorim arme.
Burime të afërta me familjen e viktimave tregojnë se A.I. ka shtënë disa herë me armë zjarri në drejtim të dy vëllezërve, duke i lënë të vdekur në vend. Pas krimit, ai është larguar me shpejtësi, duke braktisur armën e përdorur dhe veturën me targa të Shkupit, që i përkiste atij.
Mjeku i Urgjencës: Viktimat pa shenja jete në momentin e mbërritjes
Mjeku kujdestar i Urgjencës së Malishevës, Festim Sylejmani, ka konfirmuar se viktimat kanë ndërruar jetë menjëherë pas të shtënave.
“Të dy i kam gjetur pa shenja jete. Njëri kishte dy plagë në gjoks, tjetri një në kraharor dhe një në anën e djathtë. Të dy ishin pa parametra vitalë,” – deklaroi Sylejmani.
Njësitë policore, së bashku me ekipet e Prokurorisë Themelore të Gjakovës, kanë kryer ekzaminimet në vendin e ngjarjes dhe kanë mbledhur provat materiale. Kërkimet për kapjen e autorit vazhdojnë, ndërsa kontrollet janë shtrirë në zonat përreth dhe në pikat e daljes nga komuna.
Kryeprokurori Enis Gashi ka konfirmuar se është ngritur rast penal për “Vrasje të rëndë” dhe “Mbajtje nën pronësi, kontroll ose posedim të paautorizuar të armëve”.
“Kryerësi është ende në arrati. Policia dhe Prokuroria janë duke ndërmarrë të gjitha veprimet për ta kapur sa më shpejt,” – tha Gashi.
Sipas të dhënave nga Prokuroria, A.I. nuk është emër i panjohur për drejtësinë. Ai ka një aktakuzë aktive për dhunë në familje dhe kanosje, të ngritur nga Prokuroria Themelore në Prishtinë në muajin mars të këtij viti.
I dyshuari është me prejardhje nga një fshat i Drenasit, ndërsa banorët e Gollubocit shprehen të tronditur nga ngjarja tragjike që ka marrë jetën e dy vëllezërve dhe ka lënë një komunitet të tërë në ankth.
