Kryetari i Partisë Demokratike të Kosovës, Memli Krasniqi, moskonstituimin e Kuvendit të Kosovës as në tentimin e 16-t e ka quajtur serial të turpshëm të pengmarrjes institucionale nga ana e Lëvizjes Vetëvendosje.
Krasniqi ka thënë se kjo tashmë është e tepërt dhe i ka bërë thirrje sërish LVV-së që ta ndërrojë kandidaten për kryeparlamentare pasi sipas tij Haxhiu asnjëherë nuk do t’i marrë 61 vota.
Ai ka shtuar se është e pakuptueshme sesi mund të jetë kushdo kandidat më i rëndësishëm se gati 1 milion qytetarë që kanë votuar në zgjedhjet e 9 shkurtit.
“Serial i turpshëm i pengmarrjes institucionale që po e realizon VV-ja, me bllokimin jo vetëm të konstituimit, por edhe të krijimit të institucioneve sipas verdiktit të qytetarëve. Fiks një muaj më parë ne jemi mbledhur këtu për herën e parë të gatshëm për ta konstituuar Kuvendin e Kosovës dhe jemi një muaj më vonë e shumë muaj pas zgjedhjeve dhe jemi në bllokadën të cilën partia që ka dalë e para po vazhdon ta mbajë. Vërtetë kjo është e tepërt tashmë. Unë edhe njëherë i bëj thirrje Lëvizjes Vetëvendosje dhe liderit të saj Albin Kurti që ta ndërroj kandidatin e cila herë i merr 55, herë 56, herë 53 vota sepse nuk i ka marrë, nuk i merr e as nuk do t’i marrë 61 vota. Është e pakuptueshme sesi mund të jetë kushdo kandidat më i rëndësishëm se gati 1 milion qytetarë që kanë votuar në zgjedhjet e 9 shkurtit. Kjo është e pashembullt, s’ka ndodhur asnjëherë dhe unë vërtetë uroj që mos të ndodhë kurrë dhe të zhbllokohemi nga kjo situatë sa më shpejt”, është shprehur ai pas dështimit të 16-të të konstituimit të Kuvendit të Kosovës.
