Ministri i Administrimit të Pushtetit Lokal, Elbert Krasniqi, thotë se askush nga Bashkimi Evropian nuk ka marrë guximin të reagojë ndaj konstatimeve të kryeministrit të vendit, Albin Kurti, që Serbia ka shkelur tetë nene të marrëveshjes së dakorduar më 27 shkurt.
Kjo deklaratë e Krasniqit erdhi pasi u diskutua mbi deklaratën e Zëdhënësit të Bashkimit Evropian për politikë të jashtme dhe siguri, Peter Stano, i cili ditë më parë ka thënë se Kosova ka shkelur marrëveshjen kur shkarkoi Ekipin Menaxhues.
“Zëdhënësi i BE-së, nuk ka hezituar aspak të konstatoj shkeljet që pretendon se i ka bërë Kosova. Mirëpo, është shumë e qartë edhe me termat e referencës që është në kompetencën e Ministrisë tonë. Me të dorëzuar produktin, ky ekip është dekomisionuar. Qeveria jonë ka bërë edhe një përmbledhje të shkeljes së marrëveshjes së Brukselit dhe asaj të Ohrit nga ana e Serbisë. Mirëpo, as Peter Stano apo dikush tjetër, nuk ka marrë guximin të jenë eksplicit në konstatimet e Kurtit mbi shkeljet e Serbisë”, deklaroi Krasniqi në emisionin “InfoNata”.
Mirëpo Krasniqi vlerësoi që është shumë e rëndësishme që Kosova është pozicionuar me faktin që nuk do të ketë Asociacion me kompetenca ekzekutive, shkruan teve1.info.
Derisa më tej, Krasniqi foli edhe për propozimin e Kurtit lidhur me draft-statutin për Asociacionin.
“Qeveria e Kosovës është furnizuar me disa propozime në vazhdimësi. Mirëpo, është i vërtetë fakti që liritë dhe të drejtat të cilat i gëzojnë komunitetet në Kosovë, e tejkalojnë secilin nga këto propozime. Unë dhe Qeveria Kurti jemi të bindur që të drejtat politike të komuniteteve në Kosovë, tejkalojnë secilin nga këto propozime të bëra më herët”, theksoi tutje Krasniqi në Tëvë1./teve1.info/.
