Kryetari i PDK-së, Memli Krasniqi pasi që ka marrë fjalën në “Marshin për Drejtësi”, ka thënë se këtë organizim po e përcjellin drejtpërdrejt Thaçi e të tjerët që po mbahen në Hagë.
“Në këto moment janë duke na përcjellur drejtpërdrejt nga Haga çlirimtarët tanë. Po na përcjellin Hashim Thaçi, Kadri Veseli, Jakup Krasniqi, Rexhep Selimi e bashkëluftëtarët dhe ju ftoj që me një duartrokitje t’u tregojmë që jemi me ta gjithmonë”, ka thënë Krasniqi.
Kjo është përcjellë me një duartrokitje të fortë nga të pranishmit e ovacione.
“Bashkimi jonë rreth një kauze është pikërisht ajo që i duhet më së shumti Kosovës sepse vetëm kështu siç jemi sot ja kemi dalë gjithmonë që ta mbrojmë të vërtetën dhe të kërkojmë të drejtën që na takon”, ka deklaruar tutje i pari i PDK-së.
“U jam mirënjohës të gjithëve që me vetëdije të lartë bashkë me familjet tuaja jeni këtu për t’ia dhënë një pamje të këtillë Kosovës. Kjo pamje është mesazhi më i qartë dhe më i drejtëpërdrejtë që liria ka emër”.
Krasniqi ka thënë se Thaçi dhe të tjerët përveç lirisë nuk kishin mision të dytë dhe përveç pavarësisë nuk e kishin kurrë një projekt rezervë.
“Nuk kemi dyshim se do të rikthehen fitimtarë ashtu siç erdhën dikur si çlirimtarë. Sepse përveç lirisë nuk e kishin një mision të dytë dhe përveç pavarësisë nuk e kishin kurrë një projekt rezervë”.
“Ata janë pasqyra e një rrugëtimi historik e kombëtar, por që s’ka përfundu akoma. Por për ta vazhduar këtë rrugëtim, kurrë më shumë se sot nuk i është dashur vendit tonë që të rindez frymën kombëtare të bashkimit e guximit qytetar”.
Prandaj siç jemi mbledhur sot bashkë për të marshuar për drejtësi ju ftoj që ta ruajmë frymën e unitetit brenda nesh. Që ta ripërtërijmë përkushtimin tonë për Kosovën që e duam, për të cilën çlirimtarët e kanë ëndërruar dhe e kemi borxh që ta bëjmë realitet”, ka deklaruar Krasniqi.
