Lideri i Partisë Demokratike të Kosovës, Memli Krasniqi po vlerëson se kryeministri Albin Kurti e ka pranuar planin franko-gjerman pa e shfaqur transparencën e nevojshme për këtë propozim.
Sipas tij, me këtë veprim Kurti la shumë pyetje pa përgjigjje.
“Ku mbetën kushtet e tij? Cilat prej tyre u plotësuan e cilat jo? A janë përfshirë në këtë plan edhe kushtet e Serbisë? A është në përputhje me Kushtetutën e Republikës së Kosovës dhe a është pjesë e saj edhe themelimi i Asociacionit? Mbi të gjitha, a e përfshinë kjo marrëveshje njohjen e ndërsjellë?”, ka pyetur Krasniqi.
Tutje ai ka thënë se marrëveshja me Serbinë duhet t’i përmbajë, as më pak e as më shumë se pesë shtyllat e PDK-së.
“PDK i ka bërë të qarta kohë më parë pesë shtyllat që i presim nga marrëveshja potenciale me Serbinë. Gjithçka më pak është humbje e madhe për Kosovën, për të cilën, përgjegjës i vetëm do të jetë Albin Kurti”, ka shkruar ai.
