Sipas dekretit të presidentes, Vjosa Osmani zgjedhjet e rregullta lokale në Republikën e Kosovës do të mbahen më 12 tetor 2025.
Komisioni Qendror i Zgjedhjeve përmes një videoje të publikuar në Facebook ka udhëzuar qytetarët se si duhet të plotësohen fletëvotimet në zgjedhjet për kryetar komune dhe për kuvende komunale.
KQZ-ja ka bërë të ditur se fletëvotimi me kornizë të verdhë i përket zgjedhjeve për kryetar komune dhe përmban emrat e kandidatëve së bashku me subjektet politike që përfaqësojnë.
“Ju, si votues, duhet të votoni vetëm një kandidat për kryetar komune, duke vendosur shenjën në katrorin pranë emrit të tij”, thuhet në njoftim.
Ndërsa, sipas KQZ-së, fletëvotimi me kornizë të kaltër i përket zgjedhjeve për kuvendet komunale.
“Në anën e majtë të fletëvotimit, ju duhet të votoni vetëm një subjekt politik, ndërsa në anën e djathtë të tij, ju mund të votoni vetëm një kandidat për anëtar të Kuvendit Komunal nga lista e atij subjekti politik. Vota për subjektin politik llogaritet votë edhe për bartësin e listës, emri i të cilit në fletëvotim është i shkruar nga KQZ afër emrit të subjektit politik”, theksohet në njoftim./teve1.info./
