Gjashtëmbëdhjetë ekspertë gjyqësorë janë betuar të premten në Ministrinë e Drejtësisë, duke marrë zyrtarisht përgjegjësitë ligjore për ushtrimin e këtij profesioni.
Në ceremoninë e licencimit dhe betimit mori pjesë zëvendëskryeministrja dhe ministrja e Drejtësisë, Donika Gërvalla, e cila theksoi rëndësinë e ekspertizës profesionale në funksion të një sistemi të drejtësisë të bazuar në fakte dhe vlerësime të besueshme.
Gërvalla tha se pavarësia dhe integriteti profesional i ekspertëve gjyqësorë janë thelbësore për cilësinë e proceseve gjyqësore.
“Pavarësia e gjykatës në vendimmarrje duhet të mbështetet edhe në pavarësinë e atyre që ofrojnë ekspertizën profesionale. Kjo është arsyeja pse integriteti i ekspertit gjyqësor ka rëndësi për të gjithë procesin gjyqësor”, deklaroi ajo.
Ministrja u bëri thirrje ekspertëve që të ruajnë paanshmërinë dhe pavarësinë në ushtrimin e detyrës, pavarësisht kundërshtimeve apo pakënaqësive që mund të shkaktojnë përfundimet e ekspertizave të tyre.
Ajo nënvizoi se vlerësimet profesionale duhet të mbështeten gjithmonë në fakte dhe njohuri shkencore, e jo në pritjet e palëve të përfshira në proces.
Duke iu drejtuar ekspertëve të rinj të licencuar, Gërvalla tha se besimi në aftësitë e tyre profesionale duhet të shoqërohet me përgjegjësi të lartë.
“Ceremonia përfundoi me betimin e 16 ekspertëve gjyqësorë, të cilët u zotuan se detyrën do ta ushtrojnë me ndërgjegje, pavarësi, paanshmëri dhe profesionalizëm, duke respektuar normat ligjore, etike dhe standardet shkencore e profesionale”, theksohet në njoftimin e Ministrisë së Drejtësisë./teve1.info/







