Kombëtarja U15 e Kosovës në futboll, ka barazuar edhe në ndeshjen e dytë miqësore kundër Bullgarisë U15.
Pas barazimit 2:2 në duelin e parë të martën, Kosova të enjten luajti 1:1 në Kampin Nacional të FFK-së në Hajvali.
Pjesa e parë u takoi futbollistëve të Bullgarisë, ndërsa e dyta u dominua nga ata të Kosovës.
Bullgarët e rinj kaluan në epërsi në minutën e 15-të me anë të Petar Bagoev, i cili shënoi nga afërsia me kokë. Ndërkohë, rezultatin përfundimtar të takimit e vulosi Albion Rexhepi (69’) me një gjuajtje brenda zonës.
Përzgjedhësi Ilir Nallbani i vlerësoi këto dy miqësore si shumë të rëndësishme për këtë gjeneratë të futbollistëve, e cila tash e tutje për shkak të moshës do të vazhdojë me Kombëtaren U16 nën drejtimin e Mehmet Kurdës.
