Ministria e Mbrojtjes ka njoftuar se në takimin e 31-të të Grupit të Kontaktit për Mbrojtjen e Ukrainës, i mbajtur në Bruksel, Kosova është përfaqësuar nga zëvendësministri i Mbrojtjes, Shemsi Syla, si dhe nga zyrtarë dhe oficerë të lartë të Ministrisë së Mbrojtjes dhe Forcës së Sigurisë së Kosovës.
Në njoftim thuhet se gjatë këtij takimi është diskutuar për mbështetjen e vazhdueshme ndaj Ukrainës dhe forcimin e bashkëpunimit ndërmjet vendeve partnere në fushën e mbrojtjes.
Sipas Ministrisë së Mbrojtjes, pjesëmarrja e Kosovës në këtë takim nënvizon përkushtimin e saj për të qëndruar pranë aleatëve dhe për të mbështetur përpjekjet ndërkombëtare në ruajtjen e paqes, sigurisë dhe vlerave demokratike.
“Zëvendësministri i Mbrojtjes, Shemsi Syla, i shoqëruar nga zyrtarë dhe oficerë të lartë të Ministrisë së Mbrojtjes dhe të Forcës së Sigurisë së Kosovës, mori pjesë në takimin e 31-të të Grupit të Kontaktit për Mbrojtjen e Ukrainës, të mbajtur në Bruksel. Në këtë takim të radhës u diskutua për mbështetjen e vazhdueshme ndaj Ukrainës dhe forcimin e bashkëpunimit ndërmjet vendeve partnere në fushën e mbrojtjes. Pjesëmarrja e Republikës së Kosovës në këtë takim nënvizon përkushtimin e Kosovës për të qëndruar pranë aleatëve dhe për të mbështetur përpjekjet ndërkombëtare në ruajtjen e paqes, sigurisë dhe vlerave demokratike”, thuhet në njoftim./teve1.info/
