Përfaqësuesja e Kosovës në basketboll ka pësuar humbje shumë të thellë në përmbyllje të raundit të parë të parakualifikimeve për Eurobasket 2025. Të enjten mbrëma në Naestved, Kosova humbi nga Danimarka vendase me rezultatin 105:71.
Është kjo prej humbjeve më të thella që ka pësuar Kosova deri më tani. Kosova përfundon e fundit në grupin C, pas Danimarkës dhe Norvegjisë. Kështu nuk mund të avancon në raundin e dytë, por e vazhdon garimin në raundin e tretë të parakualifikimeve. Pra e ka edhe një rast tjetër.
Kosova ka humbur dy ndeshjet me Norvegjinë, ndërsa ka një fitore e një humbje me Danimarkën. Për vendin e parë në grup do të luftojnë Danimarka e Norvegjia, që takohen të dielën në Oslo.
Kosova ka shfaqur fare pak në takim me danezët. Në të vërtetë Kosovës i kanë munguar lojtarë të rëndësishëm për këtë ndeshje dhe optimizmi nuk ishte i madh as para udhëtimit. Lojtarë si Erjon Kastrati, Lis Shoshi, Mikaile Tmushiq e disa të tjerë kanë munguar për shkak të lëndimeve. Përzgjedhësi Christos Marmarinos në dispozicion i kishte vetëm dhjetë lojtarë.
Kosova u mbajt më mirë në çerekun e parë, ndërsa shkëputja e madhe e danezëve nisi në të dytin. Ndërkohë dy periudhat e fundit janë dominuar plotësisht nga danezët. Dhe në fund dallimi ishte plot 34 pikë.
Drilon Hajrizi ishte më i miri te Kosova. Ai ndeshjen e mbylli me 17 pikë e pesë kërcime. Kapiteni Dardan Berisha po ashtu realizoi 17 pikë., Ai kishte edhe shtatë asistime e tri kërcime, por edhe tetë topa të humbur. Amin Hot realizoi dhjetë pikë, pesë kërcime e pesë asistime. Ndërsa Rron Ukaj kontribuoi me tetë pikë e shtatë kërcime. Hot e Ukaj debutuan te Kosova.
Kosova ka luajtur pa amerikanë të natyralizuar dhe nuk i është afruar fitores. Danezët ishin dominonte. Kështu Kosova e përmbyll edhe një cikël kualifikues të pasuksesshëm.
