Federata e Karatesë e Kosovës, nga data 11 deri më 14 shtator mori pjesë në Kampionatin Mesdhetar të Karatesë, edicioni i 31-të me radhë.
Kampionati u mbajt në qytetin Guadalajara, Spanjë, dhe Kosova u kthye triumfuese, duke u renditur në vendin e dytë në ranglistën e përgjithshme, menjëherë pas Spanjës nikoqire.
Me 49 garues pjesëmarrës, arritën të fitojnë 7 medalje të arta, 4 të argjendta, 5 të bronzta dhe 7 vende të pesta.
Në mesin e fituesve të vendit të pestë në kategorinë Junior -68kg ishte edhe karateisti, njëherësh medalist në disa gara botërore të karatesë, Haris Mustafa.
I ftuar në emisionin e pasdites “410” në Tëvë1, Mustafa është shprehur se të përfaqësosh dhe të fitosh medalje për shtetin e Kosovës është nder dhe krenari.
“Patjetër, të përfaqësosh Kosovën në nivel evropian e botëror është një ndjenjë krenarie, sepse nuk e përfaqëson vetëm veten, por e përfaqëson edhe shtetin. Pastaj, të fitosh edhe tituj kampioni është një ndjenjë e jashtëzakonshme, pasi që jo vetëm e bën krenar familjen, por edhe shtetin”, ka thënë ai.
