Bashkimi Evropian do të nisë së shpejti mbylljen e kapitujve të negociatave të anëtarësimit me Shqipërinë.
Lajmi u bë publik këtë të martë nga Komisionerja për Zgjerimin, Marta Kos, në përmbyllje të Presidencës qipriote të Këshillit të Bashkimit Europian.
Në një mesazh publik, Kos vlerësoi se Presidenca qipriote i dha një shtysë të fortë procesit të zgjerimit.
Mes vendeve që shënuan përparim gjatë këtij gjashtëmujori, Shqipëria i është qasur mbylljes së kapitujve të parë vetëm pak më shumë se 1 vit që nga hapja e tyre.
“Shqipëria përmbushi standardet e ndërmjetme për grup kapitullin e themeloreve dhe së shpejti do të fillojë mbylljen e kapitujve”, tha Kos.
Shqipëria gjendet aktualisht në grupin e parë të atyre që pritet të anëtarësohet së bashku me Malin e Zi.
Për këtë të fundit, Komisionerja renditi si sukses pas 17 vitesh nisjen e punës së Bashkimit Evropian punën për hartimin e një Traktati Anëtarësimi për një shtet të ri.
Traktati i Anëtarësimit firmoset duke shënuar një marrëdhënie të re të vendit që pranohet me Bashkimin Evuropian.
Hapi tjetër është ratifikimi i këtij traktati nga të gjitha shtetet anëtare të BE-së.
Ndërsa ka renditur mbylljen së shpejti të kapitujve të parë për Shqipërinë, brenda bilancit të presidencës qipriote, indikacioni më i mundshëm është që procesi të jetë tashmë gati dhe të ndodhë së shpejti.
