Meriton Korenica ka marrë vendim për të ardhmen e tij, pasi ka vendosur që të largohet nga skuadra e Clujit gjatë këtij muaji.
Madje, thuhet se Korenica tashmë ka marrëveshje personale me ekipin amerikan DC United, i cili është në negociata me Clujin për të kompletuar transferimin e mesfushorit kosovar.
Korenica është plotësisht gati për të vazhduar karrierën në ligën MLS të SHBA-së, dhe është në pritje të “dritës jeshile” apo marrëveshjes mes klubeve për të finalizuar këtë lëvizje.
DC Unitedi është i gatshëm të paguajë 4 milionë euro për Korenicën, i cili është njëri prej dy lojtarëve që këtë muaj do të largohet nga Cluji, ekip që i duhen edhe dy milionë euro për të dalë nga kriza financiare.
29-vjeçari po shihet si përforcim i rëndësishëm për DC Unitedin, ndërsa me Clujin ka kontratë deri në verën e vitit të ardhshëm.
Korenica iu bashkua Clujit në verën e vitit 2024, ndërsa këtë sezon në 29 paraqitje në të gjitha garat, ka realizuar 6 gola dhe ka bërë 7 asistime.
