Ministri për Evropën dhe Punët e Jashtme i Shqipërisë, Ferit Hoxha, ka reaguar pas debatit të krijuar nga deklaratat e Ministrit të Jashtëm të Serbisë për mundësinë e hapjes së një konsullate serbe në Shqipëri.
Përmes një postimi në rrjetin social X, Hoxha sqaroi se Shqipëria ka kërkuar hapjen e një Konsullate të Përgjithshme në Luginën e Preshevës, ndërsa Serbia ka paraqitur kërkesën për hapjen e një Konsullate të Përgjithshme në Shkodër.
Sipas tij, veprimet do të ndërmerren vetëm pasi të dyja palët të bien dakord për të gjitha aspektet dhe detajet e procesit.
Ministri theksoi se reciprociteti është një parim themelor i marrëdhënieve diplomatike ndërmjet shteteve, por nuk nënkupton domosdoshmërisht barazi në objektiva apo interesa.
“Synimi dhe interesi i Shqipërisë është të krijojë më në fund një prani konsullore të përhershme në Luginën e Preshevës, një zhvillim i vonuar, në një hapësirë ku jeton një komunitet i rëndësishëm shqiptar”, shkruan Hoxha.
Ai nënvizoi se kjo përfaqësi do të krijojë mundësi më të mira për të qenë pranë qytetarëve shqiptarë në Luginën e Preshevës, duke ofruar mbështetje më të drejtpërdrejtë dhe duke kontribuar në mbrojtjen e interesave të tyre legjitime.
Në reagimin e tij, Hoxha shprehet se është e pakuptimtë që debati publik është përqendruar te interesat e supozuara të palës serbe, ndërkohë që është lënë në plan të dytë interesi i Shqipërisë dhe përfitimi konkret që sjell krijimi i një pranie të përhershme konsullore shqiptare në Luginën e Preshevës.
Në përfundim, ministri thekson se politika e jashtme e Shqipërisë bazohet në interesin kombëtar, respektimin e së drejtës ndërkombëtare dhe vlerat evropiane, standarde që, sipas tij, do të udhëheqin çdo vendimmarrje edhe në procesin e anëtarësimit të vendit në Bashkimin Evropian.
Reagimi i Ministrit Hoxha vjen një ditë pas deklaratës së Ministrit të Jashtëm të Serbisë, Marko Gjuriç, i cili tha gjatë një interviste për Radio Beograd se dy vendet kanë arritur një marrëveshje paraprake për hapjen e konsullatave në Shkodër dhe Bujanoc.
