Kandidati për deputet nga Lëvizja Vetëvendosje, Glauk Konjufca, u ka bërë thirrje qytetarëve që të marrin pjesë në procesin zgjedhor dhe të ushtrojnë të drejtën e tyre të votës.
Në një videomesazh të publikuar në Facebook, Konjufca ka theksuar rëndësinë e pjesëmarrjes masive në zgjedhje, duke e cilësuar procesin zgjedhor si një nga më të rëndësishmit për të ardhmen e vendit.
Ai ka shtuar se vetëm përmes pjesëmarrjes së gjerë në zgjedhje mund të sigurohet legjitimiteti i institucioneve dhe funksionimi demokratik i shtetit.
“Një nga proceset më të rëndësishme po ndodh sot. Ju ftoj të gjithëve që ta shfrytëzoni të drejtën tuaj të votës dhe të bëheni pjesë e drejtimit që do ta marrë Republika jonë gjatë viteve të ardhshme. Vetëm me pjesëmarrje sa më të madhe në zgjedhje sigurojmë që shteti të jetë ashtu siç e dëshirojmë. Duke marrë pjesë masivisht, sigurojmë legjitimitetin e Parlamentit dhe institucioneve të tjera demokratike, për të cilat kemi aq shumë nevojë. Qytetarit askush nuk mund t’ia zëvendësojë votën. Qytetari është i pazëvendësueshëm; vetëm ai mund të votojë dhe vetëm ai duhet të votojë. Bëhu edhe ti sot pjesë e këtij procesi dhe jepi rrugën e duhur Kosovës”, është shprehur ai./teve1.info/
