Ministri në detyrë i Punëve të Jashtme, Glauk Konjufca ka thënë se përparimi i Kosovës në sundim të ligjit, demokraci e fusha të tjera duhet të përkthehet në hapa konkretë në rrugën drejt integrimit evropian.
Ai ka thënë se integrimi në Bashkimin Evropian duhet të jetë i drejtë, i besueshëm dhe me meritë.
“Integrimi evropian duhet të mbetet proces i besueshëm, i drejtë dhe i bazuar në merita, ku përparimi i Kosovës në demokraci, sundim të ligjit, luftë kundër korrupsionit, liri të medias dhe zhvillim ekonomik njihet dhe përkthehet në hapa konkretë në rrugën tonë evropiane”, ka thënë Konjufca në takimin ministror të Procesit të Bashkëpunimit të Evropës Juglindore, në 30-vjetorin e këtij formati rajonal që po mbahet në Sofje të Bullgarisë.
Ai ka folur edhe për bashkëpunimin rajonal, ku sipas tij ky arrihet me projekte të qëndrueshme e në interes të qytetarëve.
“Për Kosovën, avancimi i hekurudhës Prishtinë–Durrës dhe përfshirja e saj në rrjetin evropian të transportit TEN-T është një projekt strategjik për lidhshmërinë e vendit tonë dhe të rajonit me Bashkimin Evropian. Po aq të rëndësishme janë zbatimi i marrëveshjeve për njohjen e diplomave dhe lirinë e lëvizjes, si dhe avancimi i marrëveshjeve për të drejtat e sigurimeve sociale dhe lejet e punës. Këto janë hapa që e bëjnë bashkëpunimin më konkret, integrimin më të prekshëm dhe të ardhmen evropiane më të afërt për qytetarët tanë”, është shprehur Konjufca.
Ai ka njoftuar në Sofije ka zhvilluar takim me homologen bullgare Velislava Petrova, duke thënë se Bullgaria është partner i rëndësishëm i Republikës së Kosovës dhe mbështetëse e vlefshme e rrugës sonë evropiane./teve1.info/
