Kryetari i Kuvendit të Kosovës, Glauk Konjufca, ka shprehur ngushëllime për vdekjen e skulptorit, Luan Mulliqi.
Konjufca, është shprehur se puna e Mulliqit e jashtëzakonshme do të shënojë përgjithnjë hapësirën publike me monumente e skulptura të nënshkruara me prurjen e rrallë artistike.
“Me pikëllim të thellë morëm lajmin e hidhur për ndarjen nga jeta të artistit, piktorit dhe skulptorit të nderuar Luan Mulliqi. Ai do të jetojë i paharruar në kujtesën tonë. Puna e tij e jashtëzakonshme do ta shënojë përgjithnjë hapësirën publike me monumente e skulptura të nënshkruara me prurjen e rrallë artistike”, ka shkruar ai në Facebook.
Ai ka ngushëlluar familjet, miqtë, të afërmit, kolegët dhe të njohurit e Mulliqit.
“Ngushëllimet më të sinqerta për familjen, miqtë, të afërmit, të njohurit dhe kolegët e tij. I përjetshëm qoftë kujtimi i tij dhe u prehtë në paqe!”, ka shkruar Konjufca.
Mulliqi, ishte anëtarë korrespodent dhe sekretar shkencor i Akademisë së Shkencave dhe Arteve të Kosovës. Ai po ashtu ishte edhe drejtor i Galerisë së Arteve.
ASHAK, njofton se për nder të tij nesër (e hënë) do të mbahet mbledhja komemorative e cila fillon nga ora 11:00.
Ndërkaq, nga ora 11:30 fillojnë homazhet për të ndjerin. Funerali niset nga Akademia e Shkencave në ora 13:00, ndërsa varrimi do të bëhet në varrezat e qytetit të Gjakovës në orën 16:00./teve1.info/
