Sipas tij, raportet mes Kosovës dhe Serbisë janë më keq se ato mes Rusisë dhe Ukrainës, dhe se nuk ka frikë që mund të ndodhë një sulm serb ndaj Kosovës.
“Natyrisht që NATO është e pranishme në Kosovë dhe përveç kësaj është e pranishme sipas një marrëveshje ushtarake që e ka me Serbinë. Unë nuk kam frikë le të themi të pajustifikuar se kjo marrëveshje mund të shkelët nga ana e Serbisë përmes një sulmi, por ne gjithmonë duhet të jemi të gatshëm që në raport me Serbinë ta mendojmë skenarin më të keq të mundshëm. Relacioni shtetëror i joni është më i keq se i Federatës Ruse me Ukrainën. Federata Ruse e ka njoftë Ukrainën, ishte pajtuar me shtetësinë e saj dhe prapë e ka sulmuar. Serbia ne as nuk na njeh. Nga ky kuptim unë mendoj se duhet të kemi kujdes të shtuar me Serbinë. Kurrë nuk duhet ta përjashtojmë mundësinë e një agresioni serb mbi Republikën e Kosovës. Forcat e Sigurisë së Kosovës duhet ta shtojnë nivelin e të drejtës së tyre për llojin e armatimit. Kosova duhet padyshim ta ketë edhe nivelin artilerik të ushtrisë së vet. NATO-n si partnerë duhet t’i bindim që Kosova ka nevojë për këtë gjë”, ka thënë ai.
Ai bëri krahasim me sulmin e Rusisë ndaj Ukrainës, i cili tha se askush nuk e mendonte këtë, dhe se një gjë e tillë mund të ndodhë, e se edhe “me Serbinë duhet ta kemi këtë frikë dhe shqetësim”.
Konjufca sa i përket zgjedhjeve në Serbi të 3 prillit, tha se mënyra si janë mbajtur zgjedhjet deri tani është më e sigurtë për stabilitetin, pra duke mos e pranuar referendumin serb.
