Kristjan Asllani duket se e ka të sigurt largimin nga Interi, por ende nuk dihet destinacioni i ri.
Së fundmi është përfolur emri i Monzës, por eksperti italian i merkatos, Gianluca Di Marzio ka “hapur” tjetër pistë.
Sipas gazetarit në fjalë, është klubi nga Emiratet e Bashkuara Arabe, Al-Jazira FC, që ka kërkuar më tepër informacion për një transferim të mundshëm të 24-vjeçarit. Raportohet se Al Jazira ka hapur negociatat me Interin dhe transferimi ka gjasa të ndodhë.
Tashmë pritet edhe “drita jeshile” nga vetë futbollisti, i cili ka refuzuar disa oferta së fundmi. Kujtojmë se në sezonin që lamë pas, Asllani luajti në huazim te Torino dhe te Beshiktashi.
