Kryetari i Komunës së Prishtinës, Perparim Rama, ka njoftuar se të mërkurën ka nënshkruar vendimin për të siguruar transportin për veteranët e Ushtrisë Çlirimtare të Kosovës, të cilët do të marrin pjesë në protestën gjithëkombëtare që do të zhvillohet më 17 tetor në Tiranë në mbështetje të ish-krerëve të UÇK-së.
Në një postim në Facebook, Rama ka theksuar se Prishtina, si kryeqyteti i Kosovës, do të vazhdojë të jetë një shembull i respektit institucional, kulturës politike dhe mirënjohjes publike ndaj atyre që kanë kontribuar për lirinë e vendit.
“Veteranët tanë nuk janë pjesë vetëm e së kaluarës por janë pjesë e ndërgjegjes sonë kombëtare dhe Prishtina, si kryeqytet i Kosovës, do të mbetet shembull i respektit institucional, i kulturës politike dhe i mirënjohjes publike. Me nderim të thellë për të gjithë veteranët, për familjet e dëshmorëve dhe për të gjithë ata që e mbajnë ende gjallë kujtesën e lirisë sonë, shihemi në Tiranë. Ju takon respekti i një kombi të tërë”, ka shkruar ai./teve1.info/
