Qe 23 vite merret me mirëmbajtjen e hapësirave të fakultetit të edukimit fizik dhe të sportit.
Por për punën që e bënë Avdyl Kuleta paguhet vetëm 300 euro.
Pagë kjo e cila është nën pagën minimale e cila ka hyrë në fuqi nga janari 2026, e që parashihet të jetë 425 euro.
“Qashtu na kanë thënë por ne nuk i kemi marrë as 350 euro që u bë ligji më herë për pagë minimale, prej vitit 2024 në shtator që ka hy në fuqi ne nuk i kemi marrë kurrë”,ka thënë Kuleta.
Për këtë ata i janë drejtuar edhe institucioneve të drejtësisë që të marrin pagat të cilat kompania e kontraktuar nga Universiteti i Prishtinës nuk ia u dha.
“Me pas shumë anëtare të familjes kjo pagë nuk të mjafton 300 euro për një familje. Tash e kemi bërë një ankesë nga 36 punëtorë sa jemi. Kemi kërkuar që më na transferua pagat prej 2024 deri tash”, ka thënë tutje Kuleta.
Pavarësisht kësaj, kjo nuk e ka demotivuar aspak 60 vjeçarin që të kryejë punën e tij
“Ne punën e kryejmë, se ne kemi pranuar që për këtë punë me punu, unë si me pas rrogën 500 euro punën e bëjë njësoj. Por me pas rrogën më të lartë kish qenë më mirë, për çdo punëtore, pasi krahasuar me çmimet rroga është e vogël”, theksoj Kuleta.
Por jo vetëm Kuleta, por edhe një numër i madh i punëtoreve në vend ende marrin pagë nën pagën minimale.
“Në 90% të rasteve ajo që e ka marrë këtë vendim nuk është duke e zbatuar sepse në 95% të rasteve janë kompani që kryejnë shërbime për institucione, për shembull për Ministrin e Arsimit, për atë të Punës, të cilat këto nuk e kanë kryer obligimin ndaj kompanive të cilat kanë për të paguar punëtorët. Kryeinspektori i punës ka kërkuar listën e kompanive të cilat nuk janë duke respektuar vendimin e qeverisë së Kosovës e ne sot veç po ja dërgojmë”, u shpreh Azemi..
Për këtë se fundmi është aktivizuar edhe Inspektorati Qendror i Punës , i cili është në kuadër të Ministrisë për Punë.
“Deri më tani IQP ka pranuar 12 informata për operatorët me pretendimin se nuk janë duke e zbatuar vendimin për pagën minimale, dhe në të gjitha rastet ku IQP konstaton se nuk është duke u zbatuar Vendimi për pagën minimale do të ndërmerren veprimet e parapara ligjore”, thuhet në njoftimin e Ministrisë së punës.
Qeveria e Kosovës kishte marrë vendim që nga janari paga minimale të jetë 425 euro bruto, kurse nga 1 korriku paga minimale pritet të bëhet 500 euro.
