Kryetari i Komisionit për Ekonomi në Kuvendin e Kosovës, Armend Muja, ka propozuar shkarkimin e katër anëtarëve të Bordit të Komisionit të Pavarur për Miniera dhe Minerale, raporton teve1.info
Muja para deputetëve tha se anëtarët: Gani Maliqi, Gani Krasniqi, Rrezarta Plakolli dhe kryesuesja Selvete Grajqevci Pllana e kanë shkelur Ligjin e këtij Komisioni andaj kërkoi që të njëjtit të shkarkohen.
Derisa tha se një anëtar tjetër ka dhënë dorëheqje paraprakisht dhe nuk hyn në këtë procedurë.
“Shqyrtimi i rekomandimit të Komisionit për Ekonomi, Industri, Ndërmarrësi dhe Tregti për shkarkimin e kryesueses dhe anëtarët e Bordit të Komisionit për Pavarur për Miniera dhe Minerale”, është pika e parë e rendit të ditës në Kuvendin e Kosovës të enjten.
Muja kërkoi që edhe vendimet e këtij Bordi të shpallen të paligjshme dhe të kthehen në rivendosje.
Kryetari i Kuvendit, Glauk Konjufca, tha se procedurat për shkarkimin e këtyre anëtarëve duhet të shkojnë veç e veç dhe jo të shkarkohen në grup.
Këto deklarime u bënë në hyrje të Seancës Plenare të Kuvendit të Kosovës, e cila do t’i trajtoj disa pika të rendit të ditës.
