Komandanti i misionit të KFOR-it, gjeneralmajor Angelo Michele Ristuccia, ka takuar peshkopin Dodë Gjergji, myftiun Naim Tërnava dhe peshkopin Teodosije Šibalić në “Camp Film City”.
Në këtë takim është diskutuar për të siguruar dialogun ndërfetar dhe për të promovuar rolin e udhëheqësve fetarë në forcimin e paqes, raporton teve1.info
“Gjenerali Ristuccia theksoi rëndësinë e të gjitha komuniteteve fetare në promovimin e paqes, tolerancës dhe respektit të ndërsjellë dhe sigurimin e unitetit përballë provave që kërcënojnë të përçajnë edhe më shumë. Fetë nuk janë probleme, por pjesë e zgjidhjes për një bashkëjetesë më harmonike”, është thënë në njoftim.
Në njoftimin e publikuar nga KFOR në Facebook është bërë e ditur se komandanti ka theksuar përkushtimin e KFOR-it për të mbështetur paqen, bashkëpunimin dhe përparimin për të gjithë njerëzit që jetojnë në Kosovë, siç thuhet në Rezolutën 1244 të Këshillit të Sigurimit të OKB-së të vitit 1999.
