Ku ngushtohet rruga, nis kolona.
Qytetarët që udhëtojnë nga Prishtina drejtë Mitrovicës, posa mbërrijnë në Smrekonicë, u duhet të përballen me kolona.
Por mbase jo edhe gjatë.
Kjo meqë te enjten, Kuvendi miratoi marrëveshjen e kredisë prej 15 milionë eurove, pikërisht për rregullimin e segmentit rrugor, Smrekonicë – Mitrovicë.
Segmenti rrugor i cili pritet të zgjerohet si pjesë e magjistrales N2 nga Smrekonica deri në hyrje të Mitrovicës, ka një gjatësi prej rreth 5 kilometra.
Një investim i tillë i tillë, po pritet jashtëzakonisht mirë nga mitrovicasit, si lehtësim për lëvizje.
“Më se e nevojshme, e keni parë kolonat si po behen, dhe rruga shumë është dëmtu”, thotë Mexhit Kurti-qytetar.
Madje ka nga ata që kanë edhe tjera propozime.
“Jo deri këtu por kjo duhet me vazhdu deri në kufi, për lehtësimin e qytetarëve, sepse ka vlerë shumë të madhe për lëvizjen e njerëzve”, shprehet Avdi Fejzullahu.
Ani se ka prej atyre që janë skeptik se mund të rregullohet.
“Është mirë me u finalizu po s’di a po munden se u nisë më 2012-tën po mbet kështu”, thotë Beqir Ferati.
Por pavarësisht nevojës, sipas kryetarit të Mitrovicës Faton Peci, mosrregullimi i saj për tërë këto vite, Mitrovicës i ka sjellë shumë pasoja.
“Fatkeqësisht nuk ka qenë në mesin e prioriteteve në të kaluarën një investim i tillë, marrë për bazë se Mitrovica ka një pozicion dhe interes nacional dhe gjeopolitik e gjeostrategjik dhe do të duhej të ishte në mesin e projekteve të para infrastrukturore për shkak se në rast se do ta kishim një rrugë të përfunduar, edhe niveli i qytetarëve që largohen nga Mitrovica do të ishte më i ulët”, thotë Peci.
Në ndërkohë nga Ministria e Infrastrukturës, nuk treguan se kur do të nisin procedurat e prokurimit për rregullimin e kësaj rruge, dhe se sa është kostoja e shpronësimeve që duhet kryer.
