Portieri i Ballkanit, Enea Koliqi është shpallur lojtari më i mirë i xhiros së fundit në Superligën e Kosovës në futboll që u zhvillua vikendin e shkuar.
FFK-ja, ka njoftuar të hënën se Koliqi është nderuar me çmimin “Ylli i Javës”, i cili ndahet për lojtarin më të mirë pas përfundimit të secilës xhiro.
Vlerësimin e më të mirit e ka bërë një komision i veteranëve të futbollit, që ka konstatuar se Koliqi ishte më i miri i xhiros. Në fakt, thuhet se Koliqi ishtë më i merituari për fitoren e Ballkanit që e shënoi në udhëtim tek Feronikeli ’74 me rezultatin 2:0.
Për Koliqin, kjo është hera e parë që nderohet më çmimin “Ylli i Javës” për këtë edicion. Megjithatë, Koliqi këtë çmim e ka ndarë me bashkëlojhtarët e Ballkanit, me të cilët shpreson që në fund ta fitoj titullin e kampionit.
“Është një vlerësim i madh për mua. Dua t’ua dedikoj të gjithë lojtarëve tanë që kanë pasur meritë për këtë fitore. Shpresojmë që të vijnë edhe çmime të tjera në të ardhmen. Objektivi i ekipit është i qartë – të jemi në vendin e parë në fund të kampionatit. Çdo ndeshje është si një finale për ne, veçanërisht në këto ndeshje të fundit, ku pikët janë të rëndësishme. Shpresojmë të vazhdojmë këtë rrugë”, tha Koliqi për faqen zyrtare te FFK-së.
Me fitoren ndaj Feronikelit ’74, Ballkani është forcuar në pozitën e parë në tabelë me 59 pikë, dy më shumë se Drita që zë vendin e dytë dhe katër më shumë se Llapi që ka rënë në pozitën e tretë.
