Komiteti Olimpik i Kosovës (KOK), ka dënuar fyerjen e shqiptarëve në ndeshjen e basketbollit Maqedoni Veriore – Rumani.
Sipas KOK-ut, veprimet e tilla janë të papranueshme dhe bien ndesh me vlerat olimpike.
“Komiteti Olimpik i Kosovës dënon ashpër gjuhën fyese, urrejtjen etnike dhe ofendimet e tifozëve maqedonas ndaj shqiptarëve, gjatë ndeshjes së basketbollit ndërmjet Maqedonisë së Veriut dhe Rumanisë, e zhvilluar në Kumanovë. Veprimet e tilla janë të papranueshme dhe bien ndesh me vlerat themelore të lëvizjes olimpike, të cilat promovojnë respektin, barazinë dhe solidaritetin mes popujve. KOK u bën thirrje institucioneve përgjegjëse, që të ndërmarrin masa konkrete ndaj gjuhës së urrejtjes dhe autorëve të këtyre sjelljeve të dënueshme, që nuk kanë vend në ngjarjet sportive”, shkruan në reagimin e shtëpisë olimpike të Kosovës.
