Komiteti Olimpik i Kosovës ka reaguar me një telegram ngushëllimi pas vdekjes së ish-boksierit të gjeneratës së artë të KB Prishtina, Nazif Gashi, i cili u nda nga jeta në moshën 74-vjeçare. Lajmi për humbjen e tij ka pikëlluar komunitetin sportiv kosovar, pasi Gashi konsiderohej një prej figurave më të rëndësishme të boksit dhe një sportist që la gjurmë të pashlyeshme në vitet më të arta të këtij sporti.
Në telegramin e dërguar familjes Gashi, presidenti i KOK-ut, Ismet Krasniqi, ka shprehur ngushëllimet më të sinqerta duke vlerësuar lart kontributin e Nazifit. “Me pikëllim të thellë morëm lajmin për ndarjen nga jeta të Nazif Gashit, boksierit të gjeneratës së artë të Prishtinës dhe sportistit që la gjurmë të pashlyeshme në historinë e sportit tonë,” shkruan Krasniqi, duke e cilësuar të ndjerin si shembull për shumë gjenerata. Ai shtoi më tej se “Nazifi ishte shembull i përkushtimit, guximit dhe disiplinës, duke u bërë frymëzim për shumë gjenerata të sportistëve të rinj”.
Nazif Gashi ishte një nga figurat që ndihmoi KB Prishtina të dominonte në ish-Jugosllavi, duke fituar pesë tituj kampioni gjatë viteve ’70 dhe ’80. Ai ishte pjesë e ekipit përfaqësues të ish-Jugosllavisë për katër vite me radhë (1974–1978) dhe fitues i shumë turneve ndërkombëtare. Vdekja e tij, sipas KOK-ut, përbën “një humbje të madhe për sportin kosovar dhe lë një boshllëk të pazëvendësueshëm në historinë e boksit tonë”.
Krasniqi ka shprehur ngushëllime për familjen, miqtë, Federatën e Boksit të Kosovës dhe klubin KB Prishtina, duke uruar që “kujtime për Nazifin të mbetet i përjetshëm” dhe duke shtuar se “i qoftë i lehtë dheu”.
Varrimi i të ndjerit bëhet sot në lagjen Arbëria të Prishtinës, ndërsa nesër Komiteti Olimpik i Kosovës do të organizojë mbledhje komemorative në sallën e kuqe të Pallatit të Rinisë, me fillim nga ora 10:00.
