Këshilli për Mbrojtjen e të Drejtave dhe Lirive të Njeriut, ka reaguar për letrën që ministrja e Drejtësisë, Albulena Haxhiu, i ka dërguar asaj të Serbisë, Maja Popoviq, në të cilën është kërkuar që shtetasit e Kosovës, Nezir Mehmetaj dhe Petrit Dula, që janë të privuar nga liria në Serbi, të kthehen në Kosovë.
Sipas KMDLNj-së, Ministria e Drejtësisë së Serbisë nuk e njeh Ministrinë e Drejtësisë në Kosovë, dhe se efekti i letrës së ministres Haxhiu është në pikën zero.
Madje, sipas tyre, ministrja Haxhiu as nuk të marrë ndonjë përgjigje.
“Letra e ministres Haxhiu vetëm rritë shpresat, pa asnjë bazë ligjore dhe pritjet e familjeve të Nezir Mehmetajt dhe Petrit Dulës se ata mund të kthehen në Kosovë në kohën që nuk ka asnjë marrëveshje midis dy ministrive dhe kur i tërë komunikimi bëhet përmes EULEX-it i cili ka treguar gjithmonë interesim për shtetasit e Serbisë, të arrestuar në Kosovë kurse nuk ka treguar fare interesim për shtetasit e Kosovës të arrestuar në Serbi”, thuhet në komunikatën e KMDLNj-së.
KMDLNj thotë së në këto kushte MD nuk ka asnjë mundësi të realizojë kthimin e shtetasve të Kosovës që janë në burgjet e Serbisë, por që sipas tyre, ka mundësi dhe detyrim që të kërkojë të drejtat e tyre njerëzore të monitorohen përmes vizitave të rregullta në institucionet ku mbahen.
“Për shkak që nuk monitorohen të drejtat e të burgosurve, shtetas të Kosovë që janë në burgjet serbe është e pamundur të thuhet nëse ato të drejta respektohen në përputhje me standardet evropiane dhe Rregullave Evropiane të Burgjeve”, thuhet tutje në komunikatë.
Për fund, KMDLNj thotë që: “Ministria e Drejtësisë duhet të sqarojë opinionin se në ç’farë baze ligjore është mbështetur kur është bërë kjo kërkesë në të kundërtën mund të mendohet se është bërë për konsum të brendshëm politik e që nuk iu ndihmon aspak, as të burgosurve e as familjeve të tyre përveçse ngjallë rritë pritjet dhe shpresat e familjeve, pa asnjë bazë dhe mundësi!”.
