Ushtruesi i detyrës së kryetarit të Organizatës së Veteranëve të Luftës së UÇK-së, Faton Klinaku ka deklaruar se vendimi i Gjykatës Speciale në Hagë për dënimin e Pjetër Shalës, është politik, duke thënë se të tilla kanë qenë edhe aktgjykimet e tilla.
Klinaku ka thënë se Gjykata Speciale i dënoi luftëtarët e UÇK-së, duke u bazuar në dëshmi të pushtuesit serb.
“Ushtria Çlirimtare e Kosovës ka luftuar kundër pushtuesit serb dhe për lirinë e popullit. Gjykata Speciale në Hagë në emër të popullit dënon luftëtarët e UÇK-së, por duke u bazuar në dëshmi të pushtuesit serb e me dëshmi të dëshmitarëve të fshehur nga populli. Ashtu sikur në aktgjykimet e kaluara, edhe në rastin e bashkëluftëtarit Pjetër Shala, Gjykata Speciale aktgjykimet i merr politikisht”, ka reaguar Klinaku në Facebook.
Ndryshe, ish-pjesëtari i Ushtrisë Çlirimtare të Kosovës, Pjetër Shala, është shpallur fajtor nga Gjykata Speciale të martën.
Shala është dënuar me burgim të njësuar në kohë prej 18 vjetësh, ku llogaritet edhe koha e kaluar në paraburgim./teve1.info/
