KFOR-i ka njoftuar për ardhjen e trupave shtesë nga Britania e Madhe dhe Rumania.
“Një kontingjent prej 200 ushtarësh britanikë nga Batalioni i Parë i Regjimentit Mbretëror të Princeshës së Uellsit dhe më shumë se 130 trupa shtesë nga Rumania mbërritën në Kosovë dhe iu bashkuan kontingjentit të Mbretërisë së Bashkaur prej 400 të dislokuarve tashmë, për ta përforcuar misionin paqeruajtës të KFOR-it”.
Sipas njoftimit, trupat britanikë dhe rumunë kanë ardhur për përforcimin e misionit paqeruajtës të Forcës së Sigurisë së Kosovë, pas sulmit terrorist të 24 shtatorit ndaj Policisë së Kosovës.
Gjithashtu, prania e tyre sipas KFOR-it ka ardhur pas rritjes së tensioneve në rajon.
“Vendosja vjen pas sulmit të dhunshëm ndaj Policisë së Kosovës më 24 shtator dhe rritjes së tensioneve në rajon për përmirësimin e pranisë së KFOR-it në veri të Kosovës dhe patrullimit përgjatë Vijës Kufiri Administrativ”, thuhet në njoftim.
KFOR-i bënë të ditur se për vendosjen e trupave shtesë në Kosovë, ka ardhur bazuar në kërkesën e Komandantit Suprem të Aleatëve të NATO-s për Evropë, si dhe është miratuar nga Aleatët në Këshillin e Atlantikut të Veriut si një hap i kujdesshëm për të siguruar që KFOR-i të ketë forcat që i nevojiten për të përmbushur mandatin e tij të OKB-së për të ruajtur një mjedis të sigurt dhe lirinë e lëvizjes për të gjithë njerëzit në Kosovë.
“NATO ka udhëhequr një operacion paqeruajtës në Kosovë që nga viti 1999 në përputhje me mandatin e saj sipas Rezolutës 1244 të Këshillit të Sigurimit të Kombeve të Bashkuara. KFOR-i aktualisht përbëhet nga mbi 4,500 trupa të kontribuar nga 27 aleatë dhe partnerë të NATO-s”, thuhet në njoftim./teve1.info/
