Dal e ngadalë po ecin rrugës përpjetë.
Familjarë e bashkëluftëtarë po vijnë këtu në Lagjen e Re të Kaçanikut, për t’i nderuar dëshmorët dhe civilët e kësaj zone.
Në nder të 26 vjetorit të rënies së 28 dëshmorëve dhe 32 martirëve, u mbajt manifestim dhe homazhe.
Për luftimet në Kaçanik, kujtimet e tij i ndau veterani Shabak Qaka.
“Jemi mbledhur sot këtu në këtë vend për të shprehu ndjenjat e pikëllimin por edhe krenarin e vëllezërve,bashkëluftëtarëve, baballarëve, gjyshërve, që ranë në këtë vend për të mos vdekur kurrë. Këta ranë në këtë vend sepse nuk e donin jetën në robëri”, ka deklaruar ai.
Nga Rakoci, para të pranishmëve kryetari i Komunës, Besim Ilazi rikujtoi historinë e dhimbshme të Kaçanikut.
“Jemi këtu për të përkujtuar 28 dëshmorët e 32 martirë në Lagjen e Re e në Rakoc. Luftëtar që na frymëzuan e edukuan se si duhet atdheu. Ata ikën në përjetësi e ne na lanë amanetin, do të vazhdojmë rrugën e tyre deri në realizimin e aspiratave. Historia jonë është e dhimbshme, luftën jo që e deshëm, por liria na e kërkonte, andaj ishin këta dëshmorë e martirë që bënë atë që duhet bërë, bënë atë që askush nuk e mendoi”.
Në përvjetorin e 26-të, për t’i nderuar të rënët për liri, në manifestim mori pjesë edhe kryeministri në detyrë, Albin Kurti.
“Në mëngjesin e 9 prillit 1999, Kaçaniku agoi i rrethuar nga forcat e ushtrisë dhe policisë së Serbisë që sulmonin popullatën civile e granatonin nga të gjitha anët. Në betejat në Lagjen e Re e në Rakoc, ranë heroikisht 28 dëshmorë të Ushtrisë Çlirimtarë të Kosovës dhe u vranë 28 martirë. Jemi këtu për ti nderuar të gjithë dëshmorët dhe martirët që ranë në betejat e Kaçanikut”, tha Kurti.
Mirëpo, prezenca e Kurtit, nuk u mirëprit nga një pjesë e veteranëve të Kaçanikut.
Këta veteranë të luftës, nuk kanë dashur të flasin për media në lidhje me reagimin e tyre.
Kujtojmë që Organizata e Veteranëve të Luftës, ka vendosur që t’i bojkotoj të gjitha organizimet e qeverisë.
