Lidhja Demokratike e Kosovës ka zyrtarizuar kandidatët për zgjedhjet lokale të 12 tetorit. Në Prishtinë, LDK-ja ka rikandiduar kryetarin aktual, Përparim Ramën.
Po ashtu, në Pejë ka rikandiduar Gazmend Muhaxherin, si dhe në Lipjan, kryetarin Imri Ahmeti.
Kandidati për kryetar në Komunën e Gjilanit, Arbër Ismajli, si dhe kandidati për kryetar të Komunës së Prizrenit, Driton Selmanaj.
Kryetari i LDK-së, Lumir Abdixhiku, tha se kandidatët për kryetar të LDK-së në komunat e Malishevës, Klinës, Kamenicës dhe Kaçanikut do të prezantohen së shpejti.
“Për Prishtinë, Përparim Rama; Lipjan, Imri Ahmeti; Obiliq, Xhafer Gashi; Podujevë, Ekrem Hyseni; Drenas, Gazmend Heta; Vushtrri, Xhafer Tahiri; Mitrovicë, Gëzim Plakolli; Pejë, Gazmend Muhaxheri; Istog, Ilir Ferati; Dragash, Bexhet Xheladini; Prizren, Driton Selmanaj; Suharekë, Ardian Shala; Ferizaj, Visar Azemi; Shtime, Kastriot Shabani; Shtërpcë, Valmir Ahmeti; Viti, Sokol Haliti; Gjilan, Arbër Ismajli; Novobërdë, Bajrush Ymeri dhe në Junik është Ruzhdi Shehu”, tha ai në konferencë për media pas mbledhjes së Kryesisë të enjten.
Sipas tij, ky është ekipi i LDK-së që do të sjellë fitore në zgjedhjet lokale të 12 tetorit.
“Që nga tani, LDK-ja është gati dhe i ka kandidaturat e plota, në harmoni dhe unitet të plotë, që fitorja e radhës, më 12 tetor, do të jetë e LDK-së”, përfundoi ai.
