Një qytetar në Prishtinë ka raportuar në Policinë e Kosovës se dy shtetas të Shqipërisë i kanë kërkuar 40 mijë euro, duke e detyruar që shumën t’ua dorëzojë brenda një afati kohor të caktuar.
Sipas raportit 24-orësh të Policisë, rasti ka ndodhur më 4 janar, kur të dyshuarit kanë shkuar në shtëpinë e ankuesit dhe i kanë bërë kërkesën për para, ndërsa rasti është raportuar më 8 janar 2026.
“Ankuesi mashkull kosovar ka raportuar se dy persona të dyshuar, shtetas të Shqipërisë, kanë shkuar në shtëpinë e tij dhe i kanë kërkuar që brenda një afati kohor, deri më 11.01.2026, t’ua dorëzojë 40.000 euro para të gatshme në shtëpinë e njërit nga të dyshuarit”, thuhet në raportin 24-orësh të Policisë së Kosovës.
Policia ka bërë të ditur se rasti është duke u hetuar nën dyshimin për veprën penale “detyrim”, ndërsa ekipet relevante policore janë duke ndërmarrë veprimet e nevojshme hetimore.
