Prokuroria Themelore në Prizren ka bërë të ditur se ka paraqitur kërkesë për caktimin e masës së paraburgimit ndaj një personi të dyshuar për veprën penale “Fajdeja”.
Ndërkohë, një tjetër i dyshuar për të njëjtën vepër ndodhet në arrati dhe është shpallur në kërkim nga autoritetet kompetente.
Sipas Prokurorisë, hetimet e deritanishme tregojnë se të dyshuarit kanë vepruar në bashkëkryerje, duke përfituar nga gjendja e vështirë financiare e viktimës. Ata dyshohet se kanë vendosur kushte të padrejta huazimi dhe kanë përfituar shuma të konsiderueshme parash, dukshëm më të larta se huaja fillestare.
Nga të dhënat e hetimit rezulton se në shtator të vitit 2021 ishte lidhur një marrëveshje huaje në vlerë prej 50 mijë eurosh, e shoqëruar me kamata mujore dhe detyrime të rënda financiare për huamarrësin. Më pas, përmes kërkesave të vazhdueshme për pagesë dhe presioneve ndaj familjarëve të tij, është kërkuar kthimi i shumave shumë herë më të larta se borxhi fillestar.
Sipas Prokurorisë, të dëmtuarit dyshohet se kanë paguar rreth 150 mijë euro, pa përfshirë shumën bazë të huasë.
Po ashtu, organi i akuzës ka njoftuar se po zhvillon hetime edhe ndaj një personi tjetër për veprën penale “Manipulimi me prova”, pasi dyshohet se ka ndërmarrë veprime që synonin pengimin ose vështirësimin e procesit penal dhe administrimin e drejtë të provave.
Duke vlerësuar seriozitetin e veprave penale, rrezikun e ndikimit te dëshmitarët, mundësinë e pengimit të procedurës dhe rrezikun e arratisjes, Prokurori i Shtetit ka kërkuar nga gjykata caktimin e masës së paraburgimit për të dyshuarin e arrestuar.
