Për disa ditë rresht, në muajin nëntor të vitit 2025 dhe janar e shkurt 2026, dëshmoi në Gjykatën Themelore në Pejë.
Alban Qoku, në cilësinë e dëshmitarit bashkëpunues, dëshmoi për rastin e njohur si “Brezovica”.
Deklarata e tij para gjykate, me urdhër të Gjykatës ishte ndaluar të publikohej.
Megjithatë, për këtë deklaratë Qokut i dolën telashe.
Detaje në lidhje me incidentin, dha Prokuroria Themelore në Ferizaj.
“I pandehuri R.K ka kanosur seriozisht se do ta vras të dëmtuarin i cili ishte i pranishëm në një dasëm, me fjalët “vetëm qenke me fëmijë se pa të vra në këtë vend nuk e kisha lanë”, i cili është edhe dëshmitar bashkëpunues në çështjen penale të njohur si “Brezovica” me qëllim të frikësimit të tij që të përmbahet nga dhënia e deklaratave në këtë çështje penale e cila është në shqyrtim gjyqësor në Gjykatën Themelore në Pejë”, ka njoftuar Prokuroria.
I pandehuri R.K është ndaluar prej 48 orëve, ndaj të cilit është paralajmëruar edhe kërkesa për caktimin e masës së paraburgimit nën dyshimet për veprat penale “Frikësimi gjatë procedurës penale” dhe “Mbajtja në pronësi, kontroll ose posedim të paautorizuar të armëve”.
I dyshuari është emër i njohur për organet e drejtësisë.
Madje, edhe ai lidhet me çështje rreth Brezovicës.
“Ka qenë i pandehur për shmangie tatimi për një pronë në Brezovicë, mirëpo ka pushuar hetimi sepse nuk është vërtetuar dyshimi i bazuar mirë, që është standard për ngritje të aktakuzës”, ka thënë Maloku.
Gjyqi në rastin “Brezovica” po zhvillohet ndaj 12 të akuzuarve për korrupsion, Bratislav Nikoliq, Dimitrije Reciceviq, Hysni Bajrami, Dragomir Milosavleviq, Sasha Milosavleviq, Arben Çitaku, Bedri Halimi, Mustafë Hyseni, Hysein Ajdini, Raif Bajrami, Sasha Spasiq dhe Jadran Kostiq.
