Anëtari i Këshillit të Përgjithshëm të Vetëvendosjes, Adnan Rrustemi është shprehur se refuzimi i partive ish-opozitare për të bërë koalicion me këtë parti, nuk është bërë për shkak të gjuhës së përdorur nga Kurti.
Ai thotë arsyeja e vërtetë e refuzimit është puna e bërë gjatë qeverisjes së Kurtit, reformat, shtrirja e sundimit të ligjit në gjithë territorin e vendit.
Madje, ai në emisionin “InfoNata” në Tëvë1, ka thënë se sikur situata në veri të ishte e ngjashme me atë se çfarë ka qenë para katër vjetëve,formimi i qeverisë nuk do të ishte problem.
“Angazhimi ynë, për të garantuar sundimin e ligjit në tërë territorin e Kosovës, eliminimi i strukturave paralele në veri të Kosovës, rezistenca që kemi bërë ndaj Serbisë, lufta kundër korrupsionit edhe goditja që i kemi bërë keqpërdorimeve të ndryshme, duket sikur në vend të përafrojë raportet e mirëfillta politike ka ndikuar në krijimin e hendekëve mes partive politike. Po të ishte gjendja në veri të Kosovës, siç ka qenë para katër viteve, me struktura paralele, barrikada me dinarë, me posta të Serbisë, pa Policinë e Kosovës atje dhe po mos të prekshin disa prej zonave të interesave të personave të caktuar, sot nuk do të ishte problem formimi i qeverisë”, ka thënë Rrustemi.
Ai ka thënë se me këto veprime kanë prishur interesa të grupeve të caktuara dhe “kumari”
“Duket sikur kemi cenuar dhe kemi prekur interesa të caktuara të palëve dhe kemi prishur kumari të ndryshme”, ka thënë Rrustemi.
Të dielën Qeveria Kurti III” nuk mori votat e mjaftueshme në Kuvend.
Pas dështimit për tu votuar edhe për një mandat për kryeministër, Albin Kurti paralajmëroi zgjedhje të reja, madje ai tha se mund të ketë zgjedhje në dhjetor, por edhe në prill, atëherë kur duhet të zgjidhet edhe presidenti i vendit.
Kurti tha se i bëri dy oferta LDK-së dhe një Nismës për koalicion, por që u refuzua.
Ai tha se nuk e kupton qëndrimin e LDK-së,e cila nuk dëshiron qeveri me LVV-në, por as me partitë tjera.
