Për Gëzim Kelmendin nga Partia Fjala, fushatat zgjedhore janë fyerje për qytetarët e Kosovës.
Kështu vlerëson Kelmendi, pasi që sipas tij, një parti politike nëse s’arrin brenda mandatit me marrë besimin e qytetarëve, në fushata pastaj ftesa e tyre është fyerje.
“Nëse një parti politike nuk ka arritur brenda mandatit të saj, qoftë katër vjeçar, qoftë tetë vjeçar, qoftë pozitë apo opozitë, nuk ka arritur ta bind elektoratin apo qytetarin se e meriton votën e tij, atëherë e kotë është një muaj fushatë që t’i bindësh qytetarët. Përkundrazi është fyerje e qytetarëve t’iu kërkosh atyre të dalin në tubime”, tha ai në emisionin “Këndi i Debatit” në tëvë1.
Kelmendi deklaron se partitë politike ndaj elektoratit nuk po prezantojnë program politik, por vetëm premtime boshe.
“Është fyerje. Nuk po shpalosin program politik. Në fushata më shumë kemi parë premtime boshe. Ajo çfarë po shohim në tubime me qytetarët, më së paku kemi shpalosje të programit, më së shumti kemi premtime boshe – për mos thënë mashtrime. Pse është fyerje për qytetarët e Kosovës? Sepse, për 25-vite pas luftës, asnjëra nga partitë politike, qoftë pozitë apo opozitë, të cilët e kanë pasur mundësinë edhe e kanë ta dëshmojnë sa kanë qenë në qeveri nuk kanë bërë që ta rrisin të ardhmen dhe perspektiven e Kosovës”, deklaroi ai./teve1.info/
