Zëdhënësi i KEDS-it, Lulzim Krasniqi është deklaruar lidhur me djegien e nënstacionit të rrymës “Prishtina” 3.
Krasniqi ka thënë se është shumë herët të dihet se cili ka qenë shkaku që shkaktoi zjarr në këtë nënstacion, ku për pasojë mbetën 22 mijë konsumatorë pa energji elektrike në kryeqytet.
Më tej, ai ka vlerësuar se përgjigjen e saktë për arsyet e mundshme të këtij incidenti, mund ta kenë organet e rendit të cilët dje edhe kanë qenë prezent në vend të ngjarjes.
“Nuk ka informata të tilla meqë është e pamundur të dihet kaq shpejt. Për këtë sigurisht organet e rendit të cilët kanë qenë dje prezent aty mund të japin një përgjigje më të saktë”, është shprehur ai për TËVË 1.
Ndryshe, rryma në disa zona të kryeqytetit është rikthyer para një ore, pas diku 30 orë mungesë të saj.
